ვახმობ სიტყვებს
(ნედლი არ გიყვარს).
გიმზეურებ და სიმინდის მარცვლებივით
კაკალ-კაკალ გიფშვნი.
ჩემი გამხმარი სიტყვები დასაფქვავად მოგიტანე წისქვილო,
ზოგი - ცის ფქვილად,
ზოგიც - მიწის ქატოდ.
საღერღელი ამეშალა,
შენთვის გასანდობი ამბები დამიგროვდა.
უცნაური ვინმე ხარ, წისქვილო,
ღერღავ და ღიღინებ.
გამოგიტყდები, ვერ ვიცხოვრე შენებურად:
”ვინც რა უნდა თქვასო, წისქვილმა კი ფქვასო”.
ვერც იმას გეტყვი,
რომ შენი ქვა არ დატრიალებულა ჩემს თავს.
ჰო, ნუ დაფრთხები, არ შეყოვნდე,
ჩემზე დარდი ღარში არ გაიჩხირო,
მოდი, ჩამოვფქვათ:
შენ წყლისა მითხარი, მე მიწისას გაგანდობ.
ფქვილს გობი უცდის მოსაზელად,
ცომს - ცხელი კეცი.
ვაცხოთ სიტყვები.
წაბლის ფოთოლში გავახვიოთ სურნელებისთვის.
ცხელ-ცხელი დავტეხოთ და ჩამოვარიგოთ.
დედა სულს შეუბერავს,
მამა დააგემოვნებს,
ბებო, ცოცხალი რომ იყოს, პირჯვარს გადასწერდა
და ყოველ ლუკმას, რაც ხელიდან დამცვივდებოდა,
ობლის იყოსო, - მიაყოლებდა.
მე ნება-ნება შევექცევი, თან მეღიმება,
ვიცი, ისევ ამეშლება საღერღელი.
ისევ გავახმობ სიტყვებს
(ნედლი არ გიყვარს),
ისევ მოგიტან ჩამოსაფქვავად,
ზოგს - მიწის ქატოდ,
ზოგსაც - ცის ფქვილად,
წისქვილო.
ნატო ინგოროყვა – © 2013. ყველა უფლება დაცულია.