უკან დაბრუნება

ვიდრე

ჩერდება ლექსი,

დრო აქვს სიჩუმის.

გათენებამდე კიდევ დარჩა საათი - ორი.

იქნებ მათხოვო შენი სიტყვა დილის შვიდამდე.

ვიდრე -

სიტყვაზე ვენდობი სიტყვას.

ვიდრე -

ხსოვნა სიკვდილივით სკამზე არ ჩამომიჯდება და

სხვათა სიტყვით, მესამე პირში დამიწყებს საუბარს.

ვიდრე -

სიკვდილისგან გამოთავისუფლებული დრო - სიცოცხლე -

საკიდარს მიღმა დარჩენილი საწვიმარივით არ დამრჩება.

ვიდრე -

ჩემი ბავშვობის თოჯინების სიჩუმეს ვთარგმნი და

საგულდაგულოდ არ ვიმალები, რომ დამავიწყდეს, სად ვარ.

ვიდრე -

აღარ დამაქვს ძველი კაბები ნაცნობ მკერავთან,

ვიკერავ ახლებს, (ოღონდ არა გულამოღებულებს),

ზურგმოხდილებს, რადგან მივდივარ და ვიცი -

თვალს გამომაყოლებ.

უკან დაბრუნება