ხსოვნა - მოსაწყენი გამოცდილებაა,
არაფერია იქ ნედლი და მოულოდნელი.
დაცულია სიტყვისგან - რისკი.
ნანგრევების ქვა
შეყვარებულია წარსულზე და
ვერ თავისუფლდება მისგან.
აქ იყო დრო,
დარჩა - ადგილი.
არ იწმინდება ფიქრი
მტვრის ფენებს შორის,
შარშანდელი და დღევანდელი.
ამოგხედავენ მობეზრებული ნივთები შიშით.
აქ იყო კარი.
დარჩა - ფანჯარა.
და როცა კარგავ, გიხარია,
რადგანაც გჯერა: ეს უკვე მოხდა.
ვერ იხანგრძლივებს ჩასაფრება ნეტარებას.
ესაა მეხსიერების თვისება -
მოჰყვები თავიდან თუ ბოლოდან,
მაინც არაფერი იცვლება.
ნატო ინგოროყვა – © 2013. ყველა უფლება დაცულია.