ამინდი გარდაცვლილთათვის
- დედა, გარდაცვლილებს ესმით, რას ამბობს ის კაცი რადიოთი?
- მათ ყველაფერი ესმით.
დღეს წვიმაა გამოცხადებული -
დასავლეთშიც და აღმოსავლეთშიც.
აქ - ჩემი ბავშვობის გაჩერებაა.
ეს ხმა იქიდან მომყვება.
ცოცხლებზე ადრე იგებენ გარდაცვლილები
მოსალოდნელ ამინდს.
მჟავეა წვიმა უდროოდ წასულებისთვის,
რადგან აქ -
არავინ დაიჯერა მათი დროული სიკვდილი.
წყლით ევსებათ ღვინის ჭურჭელი,
ვისაც არ ჩაუწეს ღვინოში პური.
ჩაიწვებიან სანთლები თავდახრილი.
წითელი კვერცხიც გაგორდება.
საღებავია სისხლი.
თბილისის დროით 12 საათია.
დღე - პარასკევი.
ნატო ინგოროყვა – © 2013. ყველა უფლება დაცულია.