ქარო ადექი, ჩადექი,
შენი ქმარი ავადაა.
ადრე მიხვალ - მორჩება,
გვიან მიხვალ - მოკვდება.
(ბებიაჩემის შელოცვებიდან)
ეს - ქარების ქალაქია.
აქ - ყველა ქუჩის მოსახვევიდან იდუმალება იხედება
და თავისკენ გიხმობს.
აქ - მრავალჯერ უყვარდათ პირველად და
უყვარდათ - ერთადერთხელ.
ის - სიყვარულის ზღვას შეურთდა.
ზღვამ უკან დაიხია.
ეს გზა
კოშკის რვა სართულად განაწილდა.
ამობრუნებულია ფეხისგული,
მოქნეულია მათრახი.
მეც გავშალე ხელები გასაფრენად.
ვერ გადავეშვი.
ეს გზა
შენც უნდა გაიარო.
ოღონდ - ნუ გაიმეორებ.
გიყვარდეს უბრალოდ,
ასე:
თვალდახუჭულს.
ბაქო, 9 აპრილი, 2010 წელი
ნატო ინგოროყვა – © 2013. ყველა უფლება დაცულია.