სიზმარ-ცხადი
”ურდული ასწიე და კარი თვითონ გაიღებაო”.
ზღაპრიდან
ხდება ასე - სინამდვილეშიც
უფასურდება ყველაფერი - გადანახული
ისევე როგორც
ოდესღაც შემნახველ სალაროებს
მიბარებული უზრუნველი სიბერე.
ხდება ასე - ცხადშიც
ჩაპირქვავდები საკუთარ თავში,
ძილს გვერდს უბრუნებ და
საბანსაც შემოუკეცავ.
ხდება ასე - სიზმარში
იჯერებ, რომ იწყებ თავიდან,
მუჭა-მუჭა გაგაქვს სიზმარი
და გეჩვენება: ცხადში გაიტან.
ხდება ასე - სიფხიზლეში
მთვრალი კაცივით მღერი ხმამაღლა
და საკუთარ თავს
ისევ შენივე ხმით ამხნევებ.
სცადე და
გაუმხილე ეს ამბავი
სხვა მძინარე ადამიანებს.
გააღვიძე და
დააჯერე
გაუღონ კარი
და
გაუშვან.
ნატო ინგოროყვა – © 2013. ყველა უფლება დაცულია.